網絡轉載:
認清8個殘酷真相 令你活得更開心！
人人都話人生係要自己去創造，
面對高低起跌，你嘅態度同行動往往影響繼後嘅事。
能夠早啲認清唔容易接受嘅事實真相，
有助你生活得豁然開朗。
1.朋友來又去
朋友圈子總係如流水般來又去，
一輩子嘅朋友未必係必然。
試回想由小學升讀中學，
如果你同死黨無派到同一間學校，
當各自認識咗新嘅同學後，即使住得近，
友情都好容易漸漸褪色。
同樣情況一樣發生喺升大學/轉工等等。
每轉換一次新環境就會出現新嘅朋友，
即使大家而家感情有幾緊密，幾年之後環境改變咗，
彼此的溝通方法改變了亦係平常嘅事。
溫馨提示：接受永遠嘅朋友唔係必然，
當你面對友情無聲無息地逝去時，以平常心對待，
並同時接受大家的相處模式會隨時間、環境而有所調整。
話雖如此，其實生命中仲有好多精彩嘅人同關係等待你去發掘，
即使呢一刻你無知心友，唔使緊張，友誼總係有無限嘅可能性。
2.心想不一定會事成
人生總係有唔如意嘅事，簡單如小時候，
你可能諸多暗示/明示仍然收唔到想要嘅生日禮物。
長大後，經常面對其他人遲到浪費自己時間、
令你失望嘅人同事、想買嘅東西買唔到……等等。
溫馨提示：唔好將快樂建築喺物質上，
面對大大小小唔如意嘅事，學習接受，
人生苦短，唔值得為小事抓狂！
反而應該認真諗諗你「想」嘅事係咪不切實際或根本唔係你想要嘅。
3.總有啲人愛/不愛你
無論你係明星、義工、OL、學生……每一個人喺人生中，
總係有啲人愛護你，亦有啲人無緣無故唔鍾意你，
你可推斷出無盡嘅因由，
如妒忌或純粹因為你唔係佢杯茶，
總而然之，無人可以獲得全宇宙嘅喜愛。
溫馨提示：有人唔鍾意自己又如何？
你都有唔鍾意嘅人啦。
其他人花時間去斟酌是佢哋嘅問題，
你絲毫無損，你仍是你，
你唔需要從人哋嘅喜愛嚟成就自信。
4.只有你能改變自己嘅生命
別人嘅關注、like、加油打氣鼓勵只係助燃劑，
真正令人生發光發亮，仍然係要靠自己努力。
溫馨提示：為自己籌謀，學習解決問題，
你依賴嘅人（父母、兄弟姐妹、同學、男朋友）
唔會成日喺你身邊幫忙，其實你都唔需要依靠他人過活。
5.失敗有時
無人唔會犯錯，失敗嘅經驗人人皆有，
考試、工作、比賽甚至係朋友問嘅IQ題，
你都可能唔達標。
溫馨提示：失敗乃成功之母，將來成功與否，
在乎你能唔能夠汲取當中寶貴嘅教訓。
面對失敗，要欣然接受，從失敗中學習先會成功在望。
6.事情總係節外生枝
興高采烈準備一切出外郊遊，
突然天氣變壞成唔到行；或者係精心籌備好嘅計畫書，
竟然因為電腦壞咗無備份而錯過交功課嘅死線。
咁黑仔嘅事，總係殺人一個措手不及，令人沮喪。
溫馨提示：唔好為自己控制範圍以外嘅事抓狂。
學習應付突如其來嘅變化，你唔可以令時空逆轉改變過去，
但你可控制自己面對事件嘅態度。
7.希望不是在明天
我哋永遠無法預計自己下一刻遇到嘅事：
車禍、心臟病發、意外，甚至世界末日都可能出現。
飛來橫禍，只能面對，但可能唔係如你所想。
溫馨提示：把握當下，愛要愛得及時，
表達對家人/朋友/愛人的關心，唔好為小事執着，
花多啲時間做鍾意嘅事。
8.人生是不公平的
無論係金錢、愛情、朋友，甚至係Facebook likes，
樣樣要比較，總有其他人比自己更優更強。
不斷追求所想要嘅，其實有一個十分重要嘅教訓……
教訓：純粹因為擁有較多，就會開心啲嗎？
揭開任何一本名人傳記，總係睇得出佢哋鍾意努力嘅過程，
多過財富帶嚟物質上嘅快樂。
即係應該將注意力集中在你喜愛嘅事上，
而唔係呢件事能夠帶俾你嘅好處，反正好處自然會來。
